ორად გაყოფილი მოსახლეობა სოფელ ბუკნარში – სოფელში მუფთი ჩავიდა

სოფელ ბუკნარში ქობულეთისა და ჩოხატაურის მუფთი ასლან ბერიძე ჩავიდა. 

როგორც მუფთმა აღნიშნა, პარასკეობით ლოცვა აუცილებლად შესრულდება.

ასლან ბერიძის თქმით, აქ ლოცვა არ გაჩერდება, ლოცვა გაგრძელდება და ეს არავის უშლის ხელს.

„აქ ატრიბუტი არ აქვს, მინარეთი არ აქვს, მოწოდება არ აქვს ისეთი, რომ ვინმეს ხელი შეეშალოს. მოდის ადამიანი 10-15 წუთით, რომ ილოცოს და წავიდეს,“- აცხადებს მუფთი.

ჩოხატაურის მერის ირაკლი კუჭავას განცხადებით, სოფელ ბუკნარში ქრისტიან და მუსულმან მაცხოვრებლებს შორის კონფლიქტში აქტიურად არის ჩართული და მოსახლეობასთან შეხვედრები გაგრძელდება.

ამ დროისთვის ერთმანეთთან დაპირისპირებული ჯგუფები სხვადასხვა ლოკაციაზე არიან შეკრებილი. ადგილზე კონფლიქტის მოსაგვარებლად შესაძლოა ადგილობრივი ხელისუფლების წარმომადგენლები მივიდნენ.

შეგახსენებთ სოფელ ბუკნარის ცენტრში ადგილობრივი ქრისტიანების აქცია მიმდინარეობს. ისინი ეწინააღმდეგებიან ადგილზე ახალი მეჩეთის აშენებას და მოსახლეობას შორის დაწყებული კონფლიქტი სისხლიან დაპირისპირებაში გადაიზარდა.