სომხეთში რუსეთის საგარეო საქმეთა და თავდაცვის მინისტრები ჩავიდნენ

სომხეთში რუსეთის საგარეო საქმეთა და თავდაცვის მინისტრები ჩავიდნენ. ინფორმაციას ადგილობრივი და რუსული მედია ავრცელებენ.

აქ ჩამოვედით სრულიად კონკრეტული ამოცანებით, დიდი გეგმით და მისი განხორციელების იმედი გვაქვს, – სომხური მედიის ინფორმაციით, ამის შესახებ რუსეთის თავდაცვის მინისტრმა სერგეი შოიგუმ სომხეთის პრემიერ-მინისტრ ნიკოლ ფაშიანთან შეხვედრაზე განაცხადა.

„თქვენ იცით, რომ განცხადების ხელმოწერის შემდეგ ჩვენ სწრაფად გამოვაგზავნეთ სამშვიდობო ჯარები და გუშინწინ დავასრულეთ მათი განლაგება. ყარაბაღის მთელ ტერიტორიაზე 23 სადამკვირვებლო პოსტი განვალაგეთ. ვაკონტროლებთ სტეფანაკერტისკენ მიმავალ გზას, ლაჩინის დერეფანს, უზრუნველვყოფთ გადაადგილების კონტროლს და ასევე, ასევე აქედან წასული ლტოლვილების დაბრუნებას.

წინ ბევრი სამუშაო გველოდება. ჩვენი მთავარი ამოცანა რა თქმა უნდა არის ის, რომ არ დავუშვათ სისხლისღვრა. ამის გარდა, ვაპირებთ განვიხილოთ ჩვენი სამშვიდობოების მომავალ ცხოვრებასა და მუშაობასთან დაკავშირებული საკითხები და, რა თქმა უნდა, სამხედრო და სამხედრო-ტექნიკური მიმართულებით ჩვენს თანამშრომლობასთან დაკავშირებული თემები. დიდი გეგმით ჩამოვედით და მისი განხორციელების იმედი გვაქვს,“- განაცხადა შოიგუმ.

ფაშინიანის თქმით „ომამდე რთული პერიოდი იყო, მაგრამ ახლა უფრო რთული დროა. იმედი მაქვს, რომ ჩვენს ურთიერთობებს გავაღრმავებთ. ეს შეეხება როგორც უსაფრთხოების საკითხს, ასევე თანამშრომლობას სამხედრო-ტექნიკურ სფეროში“.

ასევე ვრცელდება ინფორმაცია, რომ სომხეთის დედაქალაქში რუსეთის საგარეო საქმეთა მინისტრი, სერგეი ლავროვი ჩავიდა. ლავროვთან ერთად ერევანში რუსეთის მთავრობის სხვა წარმომადგენლებიც იმყოფებიან.

მხარეები მოლაპარაკებების დროს მთიან ყარაბაღში კონფლიქტის ზონაში არსებულ ვითარებას განიხილავენ.