კელი დეგნანმა იმედი გამოთქვა, რომ მეტი ამერიკული კომპანია განახორციელებს ინვესტიციას საქართველოში

ამერიკის შეერთებული შტატების ელჩმა, კელი დეგნანმა იმედი გამოთქვა, რომ მეტი ამერიკული კომპანია განახორციელებს ინვესტიციას საქართველოში.

„ჩვენ ბევრს ვმუშაობთ ამ შესაძლებლობების შესაქმნელად და თანხვედრაში მოსაყვანად. ვფიქრობ, რომ კორონავირუსული პანდემიის დროს, დავინახეთ, რამდენად მნიშვნელოვანია, რომ ტვირთმა იმოძრაოს და ამ მიმართულებით ფოთის პორტი სრული დატვირთვით მუშაობდა, რაც იმის მანიშნებელია, რომ არსებობს მოთხოვნა, არსებობს შესაძლებლობა ამ რეგიონში და რა თქმა უნდა, ამაში მნიშვნელოვანი როლი საქართველომ უნდა შეასრულოს, როგორც რეგიონულმა სატრანსპორტო ჰაბმა, რისკენაც, როგოც ვხედავ, საქართველო მიისწრაფვის, რომ შეასრულოს. ვისურვებდით, რომ ამერიკულ კომპანიებს თავისი წვლილი შეეტანათ ამის განხორციელებაში და ვიმედოვნებ, რომ ამერიკული კომპანიები ამ მიმართულებით იმუშავებენ“, – აღნიშნა დეგნანმა.

ამასთანავე მან ინვესტორების მოზიდვის პროცესში, სამართლიანი სასამართლო სისტემის მნიშვნელობას გაუსვა ხაზი.

„ნებისმიერი უცხოური ინვესტორისა და ბიზნესმენის მოსაზიდად ფუნდამენტური მნიშვნელობის მატარებელია დამოუკიდებელი სასამართლო სისტემა. ბიზნესმენებს სჭირდებათ იცოდნენ, რომ ისინი ინვესტიციას ახორციელებენ იმ ქვეყანაში, რომელსაც აქვს სანდო სასამართლო სისტემა, რომ მათი დავები გადაწყვეტილი იქნება სამართლიანად და დროულად. ამის გარეშე, ინვესტორები საკუთარ ფულს სადმე სხვაგან ჩადებენ. ასე რომ, ეს არის მიზეზი, რატომაც მუშაობს ამერიკის შეერთებული შტატები საქართველოსთან ერთად მრავალი წლის განმავლობაში სასამართლო სისტემის შესაქმნელად“, – აღნიშნავს დეგნანი.