საზოგადოებისთვის PCR კვლევები უფრო ხელმისაწვდომი უნდა იყოს, – გამყრელიძე

ამირან გამყრელიძე აცხადებს, რომ 15 მაისამდე Covid 19-ით ინფექციაზე დღეში 1 500-დან 1 700-მდე კვლევის, ხოლო 15 მაისის შემდგომ 2000-დან 2 500-მდე კვლევის ჩატარება იგეგმება. მისივე განცხადებით, რადგან შეზღუდვები შემსუბუქდა, საზოგადოებისთვის PCR კვლევები უფრო ხელმისაწვდომი უნდა იყოს.

„ჯანდაცვის მინისტრთან შეხვედრაზე განვიხილეთ ლაბორატორიული კვლევების გაფართოების საკითხი. ძირითადი აქცენტი მოლეკულურ კვლევებზეა. დღეს ჩვენ გვქონდა პიკი – ერთ დღეში 12 ლაბორატორიაში ჩატარდა 1 096 კვლევა. კვლევებში 5 ლაბორატორიიდან 12 ლაბორატორიამდე ავედით და იქითა კვირიდან კიდევ 3-ის დამატებაა გათვალისწინებული. გვინდა, რომ მაისის 15 რიცხვამდე დღიურად 1 500-დან 1700-მდე კვლევა ვაწარმოოთ. 15 მაისის შემდგომ უკვე 2 000-დან 2 500 კვლევამდე ასვლას ვაპირებთ . როდესაც შეზღუდვითი ღონიძიებების შემსუბუქება ხდება, აუცილებელია, უფრო ფართომასშტაბიანი და უფრო ფართო ხელმისაწვდომობა იყოს PCR კვლევაზე. ასევე მეორე მხრივ, აუცილებელია ჰოსპიტალური სისტემის და პირველადი ჯანდაცვის სისტემის სრული მზადყოფნა. აი, ამ მიმართულებით მიდის ახლა ქვეყანა. ვფიქრობ, რომ აქამდე გატარებულმა ზომებმა, რაც სახელმწიფომ, საზოგადოებამ – ყველამ ერთად გაატარა, მოგვიყვანა იქამდე, რომ ჩვენთან ინფექცია ჯერჯერობით ისევ დუნედ იზრდება, ანუ არ გვაქვს დიდი ნახტომისებური ზრდები,“ – განაცხადა გამყრელიძემ.

მისივე განცხადებით, ახლა ქვეყანა ყველაზე საპასუხისმგებლო კვირებს გადის.

„ყველა ქვეყნისთვის შიდა გავრცელების დაწყებიდან მე-6, მე-7, მე-8 კვირა გახლავთ ყველაზე უფრო საპასუხისმგებლო კვირები და მოსახლეობას მოვუწოდებ, ყველა რეკომენდაცია, რასაც ჯანდაცვის სექტორი იძლევა, დავიცვათ. მაშინ დარწმუნებული იყავით, რომ ჩვენი ქვეყანა ამ ეპიდემიიდან შედარებით ნაკლები დაზანებით გამოვა,“ – დასძინა გამყრელიძემ.

მსგავსი სტატიები