ახალგორის ე.წ. გამშვები პუნქტი კვლავ ჩაიკეტა

საოკუპაციო რეჟიმმა ახალგორის შესასვლელი დღეს კვლავ ჩაკეტა. დე ფაქტო ცხინვალის ე.წ. უშიშროების კომიტეტი აცხადებს, რომ ახალგორის მოქალაქეებს, რომლებიც საქართველოს მიერ კონტროლირებად ტერიტორიაზე იღებენ პენსიას, „საზღვარზე“ გასვლის საშუალება ორ თვეში ერთხელ შეეძლებათ.
„მართალია, საოკუპაციო ძალების მხრიდან დაანონსებული იყო, რომ ახალგორის შესასვლელში არსებული ე.წ. გამშვები პუნქტი 6 თებერვლის ჩათვლით იქნებოდა დაბის მცხოვრებლების გარკვეული კატეგორიისთვის ღია, თუმცა, არსებობდა მოლოდინი, რომ ეს პერიოდი გახანგრძლივდებოდა. სამწუხაროდ, ახალგორელების მოლოდინი არ გამართლდა და დღეს დილიდან, დე ფაქტო რეჟიმის წარმომადგენლებმა ოკუპირებული დაბის შესასვლელი კვლავ ჩაკეტეს. არსებული ინფორმაციით, დაახლოებით, ორი თვის შემდეგ -მარტის ბოლოს უნდა გახსნან გარკვეული დროით.
აქვე უნდა გითხრათ ისიც, რომ ახალგორში მცხოვრებმა 50-მდე მოქალაქემ, იმ ადამიანებმა, ვინც პენსიას საქართველოს ცენტრალური ხელისუფლების კონტროლირებად ტერიტორიაზე იღებენ, ამჟამად ვერ შეძლეს ახალგორის დატოვება და ცენტრალური ხელისუფლების კონტროლირებად ტერიტორიაზე გადმოსვლა იმის გამო, რომ მათ არ ჰქონდათ დე ფაქტო რეჟიმის მიერ გაცემული „პროპუსკები“. გუშინ ამ ადამიანებს აღნიშნული ე.წ. საშვები მისცეს, რის საფუძველზეც იმედი გვაქვს, რომ ორი თვის გასვლამდე, აღნიშნულ პირებსაც მიეცემათ გადაადგილების უფლება“, – აცხადებს ახალგორის მუნიციპალიტეტის გამგებელი.