აუტიზმის პროგრამის რიგში მდგარ 230 ბავშვს თბილისის მერია დააფინანსებს

230 ბავშვს, რომლებიც აუტიზმის პროგრამის რიგში დგანან, თბილისის მერია დააფინანსებს. ეს ინფორმაცია თბილისის მერმა დედაქალაქის მთავრობის სხდომაზე განაცხადა.

„აუტიზმის სპექტრის დარღვევის მქონე ბავშვებისთვის გვაქვს სპეციალური პროგრამა, რომელიც წარმატებით მიმდინარეობს და ამასთან დაკავშირებით, კიდევ ერთი სიახლე გვაქვს. მოლოდინის რეჟიმში იყო, დაახლოებით, 230 ბავშვი, ვინც ელოდებოდა თავის რიგს, ეს, რა თქმა უნდა, მათთვის, მათი ოჯახებისთვის სერიოზული პრობლემა იყო, ჩვენ მივიღეთ გადაწყვეტილება, რომ ეს ბავშვებიც დავაფინანსოთ. 1000 ბავშვზე იყო გასულ წელს დაფინანსება და 1230-მდე გაიზრდება.

ჩვენ შარშან ასევე, გავზარდეთ პროგრამით მოსარგებლეთა ასაკის ზედა ზღვარი 15-დან 18 წლამდე, ამან მნიშვნელოვანი შეღავათი მისცა ოჯახებს.

პროგრამის ფარგლებში, ყოველთვიურად, 1 ბავშვის დასაფინანსებლად გამოყოფილია 400 ლარი. ეს არის ის თანხა, რაც სჭირდება რეაბილიტაციას. პროგრამით მოსარგებლეები ასაკობრივ ჯგუფებად არიან დაყოფილი და მათ თვის განმავლობაში კომპლექსური თერაპიის 20 სეანსი ჩაუტარდებათ. სეანსები მოიცავს მულტიდისციპლინური გუნდის, ფსიქოლოგის, ფსიქიატრის, ნერვოლოგის, ქცევითი თარპევტის, ლოგოპედის, სპეციალური პედაგოგისა და სხვა სპეციალისტების მომსახურებას,“- აცხადებს თბილისის მერი.