დაავადებათა კონტროლის ცენტრის რეკომენდაციები გრიპისგან დასაცავად

გრიპისაგან დასაცავად დაავადებათა კონტროლის ცენტრი საზოგადოებას რჩევებს აძლევს.
ცენტრის განცხადებით, სასურველია მოქალაქეებმა აცრები ჩაიტარონ; რეგულარულად იბანონ ხელები; არ შეეხონ ხელით თვალებს, ცხვირსა და პირს; მოერიდონ კონტაქტს დაავადებულებთან; ავადმყოფობის შემთხვევაში კი უნდა დარჩნენ სახლებში.
განსაკუთრებით მნიშვნელოვანია ორსულთა ვაქცინაცია – ორსულობის ვადის მიუხედავად – აცხადებენ ცენტრში.

„აცრები კრიტიკულად მნიშვნელოვანია ბავშვებისთვის 6 თვიდან 5 წლამდე ასაკში, ხანდაზმულთათვის, ქრონიკული დაავადების მქონე პირთათვის და ჯანდაცვის სექტორში დასაქმებულთათვის.
სუფთა ხელები ხელს უწყობს მრავალი ინფექციური დაავადების პროფილაქტიკას, გრიპის ჩათვლით. ხელის ჰიგიენის დაცვა – საკუთარი და ოჯახის წევრთა ჯანმრთელობის შენარჩუნების მარტივი გზაა.

რეგულარულად დაიბანეთ ხელები საპნითა და გამდინარე წყლით, გულმოდგინეთ გაიმშრალეთ ერთჯერადი ქაღალდის ხელსახოცით. თუ წყალი და საპონი ხელმიუწვდომელია, შეიძლება ხელის დასამუშავებელი სპირტის შემცველი ანტისეპტიური საშუალებების გამოყენება.

თვალები, ცხვირი და პირი – გრიპის ვირუსის ორგანიზმში მოხვედრის ყველაზე სავარაუდო გზაა. შესუნთქულ ჰაერში გრიპის გამომწვევის არსებობის გაკონტროლება შეუძლებელია, მაგრამ შეგიძლიათ შეამციროთ დაავადების რისკი თუ არ შეეხებით ხელებით სახეს. თუ ეს ძალიან საჭიროა, თვალებს, პირსა და ცხვირს შეეხეთ ერთჯერადი ცხვირსახოცით ან წინასწარ საპნით დაბანილი ხელებით. თუ გრიპით ხართ ავად, თქვენ საფრთხეს უქმნით ირგვლივ მყოფთ. განსაკუთრებული საფრთხის ქვეშ არიან ისეთი ქრონიკული დაავადების მქონენი როგორიცაა კიბო, გულის დაავადებები, აივ ინფიცირებულები. ირგვლივ მყოფთა კონტაქტების დროული შეზღუდვის გადაწყვეტილება ხელს შეუშლის გრიპის შემდგომ გავრცელებას და შესაძლოა გადაარჩინოს ვინმეს სიცოცხლე,“ – განაცხადეს დაავადებათა კონტროლის ცენტრში.