ჩხენკელი არამხოლოდ ამზადებდა რეფორმებს, არამედ თვითონვე იყო ჩართული მათ განხორციელებაში – გიორგი გახარია

პრემიერი გახარია, განათლების მინისტრის პოზიციაზე მიხეილ ჩხენკელის დანიშვნას ეხმაურება. მისი განცხადებით, ჩხენკელი შეძლებს დროის დაკარგვის გარეშე რეფორმები გაატაროს განათლების სფეროში. პრემიერის თქმით, განათლების მინისტრი ბოლო წლების განმავლობაში არამხოლოდ ამზადებდა რეფორმებს, არამედ თვითონვე იყო ჩართული მათ განხორციელებაში.
„ხაზგასმით მინდა აღვნიშნო, რომ ბატონი მიხეილი განათლების სისტემური რეფორმის თვალსაზრისით, ჩართული იყო როგორც ამ რეფორმის მომზადების, შემდგომ ამ რეფორმის განხორციელების ყველა ეტაპზე და შესაბამისად, მან ზედმიწევნით ზუსტად იცის, რა ხდებოდა ბოლო წლების განმავლობაში განათლების სამინისტროში, როგორ მზადდებდა ეს რეფორმა და როგორ ხდებოდა მისი აღსრულება. ეს არის ჩვენთვის უაღრესად მნიშვნელოვანი და სწორედ ამიტომ, რა თქმა უნდა, სხვა ღირსებებთან ერთად ბატონი მიხეილი შეძლებს სწრაფად, დროის დაკარგვის გარეშე განაგრძოს ის რეფორმები, რომელიც წარმატებით მიმდინარეობს განათლების სამინისტროში“ – ამბობს პრემიერ-მინისტრი.
გახარიამ, ასევე, ყურადღება გაამახვილა პროფესიული განათლების მნიშვნელობაზეც.
„ხაზგასმით მინდა აღვნიშნო და დავავალო ბატონ მიხეილს, რომ განსაკუთრებული ყურადღება დავუთმოთ პროფესიულ განათლებას. პროფესიული განათლება დღეს ჩვენი ყველაზე მნიშვნელოვანი გამოწვევაა, რათა ჩვენ შევძლოთ უახლოესი წლების განმალობაში აღმოვფხვრათ ის დისბალანსი, რაც გვაქვს შრომის ბაზარზე. ბატონო მიხეილ, მინდა ამას განსაკუთრებული ყურადღება დაუთმოთ“,- აცხადებს გიორგი გახარია.