შესაძლოა საარსებო მინიმუმის გაანგარიშება გაუქმდეს – „საქსტატის“ დირექტორი

„საქსტატის“ აღმასრულებელი დირექტორი, საარსებო მინიმუმის გაანგარიშების მეთოდოლოგიის გადაიხედვაზე ან საერთოდ გაუქმებაზე საუბრობს.
როგორც ირკვევა, კონკრეტული ნაბიჯები ჯერ დაგეგმილი არ არის, თუმცა დაინტერესების შემთხვევაში მზად არიან გაუქმებასთან დაკავშირებით მოლაპარაკებებიც ჩატარდეს.
„განვითარებულ ქვეყნებში საარსებო მინიმუმის გაანგარიშების პრაქტიკა არ არსებობს. საარსებო მინიმუმის გაანგარიშება ძირითადად, ყოფილი საბჭოთა კავშირის ქვეყნებში ხდება. საარსებო მინიმუმის გაანგარიშებისას „საქსტატი“ ეფუძნება მინიმალურ სასურსათო კალათას, რომელიც ჯანდაცვის მინისტრის ბრძანებითაა განსაზღვრული. არსებული მეთოდოლოგიით, რომელიც თუ არ ვცდები 2003 წელსაა შემუშავებული, ხდება მინიმალურ სასურსათო კალათაში შემავალი პროდუქტების ფასებზე დაკვირვება და საარსებო მინიმუმის გაანგარიშება. საარსებო მინიმუმის გაანგარიშების მეთოდოლოგიის ცვლილება მხოლოდ „საქსტატის“ კომპეტენციას არ წარმოადგენს. მეთოდოლოგიის ცვლილება ხდება მთავრობის დადგენილებით და ინიცირების უფლება ერთობლივად „საქსტატს“, ჯანდაცვის, ეკონომიკისა და ფინანსთა სამინისტროებს აქვთ”, – განაცხადა გოგიტა თოდრაძემ.
შეგახსენებთ, 2019 წლის სექტემბრის მონაცემების მიხედვით, შრომისუნარიანი ასაკის მამაკაცის საარსებო მინიმუმი 189.9 ლარია, საშუალო მომხმარებლის საარსებო მინიმუმი – 168.2 ლარი, საშუალო ოჯახის საარსებო მინიმუმი კი 318.6 ლარია.